Profil 2018-07-25T16:28:38+00:00

Lois Rottonara Rott é nasciü a La Ila dl 1938. Do avëi frecuenté la Scola d’ert de Sëlva ál stlüt jö i stüdi al Magistero d’ert a Firenze. Al s’á dé jö cun l’insegnamënt por passa 20 agn tles scores de Milan, dla Val Badia y te deplü Istituc dla Lombardia. Te süa ativité artistica s’ál dediché ala scoltöra, pitöra y inrescida de tecniches nöies laoran cun deplü sortes de materiai tla scoltöra sciöche lëgn, brom, petun, ceramica y tla pitöra cun öre sön drap, temperes, acuarei, dessëgns y cun pitöres murales. Les operes de Rott é da ciafé a livel internazional pro Galeries y Istituc d’ert, dlijies, operes publiches y coleziuns privates.

L’ert de Rott é caraterisada dala preferënza por le ciaval y por la figöra feminila sciöche sogec artistics y so stil unich é caraterisé dales figöres “spacades”, sides tles scoltöres che tles pitöres. Dala sfëssa definida tres le corp dl soget vëgnel a löm na rapresentaziun realistica de öna na pert, dl profil, deperpo che l’atra pert se presënta sciöche nia definida, te n ecuiliber danter pert y totalité, ester y nia ester, realté y some. I corusc stersc ti dá espresciun al conzet de ligrëza, de pasciun y de belëza.

MOSTRES

Rott á fat mostres personales y á tut pert a mostres coletives tl’Europa, dantadöt tla Talia y ti Paisc Todësc, tl Nord- y tl Süd America.

Dl 2017 ál metü fora tl contest dla 57. Bienala d’ert de Aunejia tl Palazzo Albrizzi y dl 2013 tl MART a Rorëi. Dl 2016 ál metü fora a Spoleto Arte curatada da Vittorio Sgarbi al Festival dei due Mondi y é gnü chirí fora por le proiet D.O.C. – artisć por investí de Paolo Levi ala Trienala de Verona, a New York y a Washington. Dl 2012 ál ilustré cun sües operes le Calënder d’Advënt artistich dla BMW. Dl 2015 ál tut pert ala mostra internazionala Miami meets Milano a Miami metüda a jí dala Biennale Milano tl contest de Miami Art Basel y dl 2014 ala Bienala d’ert de ArtExpó tl Prinzipat de Monaco.

Rott vëgn dant te deplü catalogs d’ert sciöche:

  • Maestri, curaté da Vittorio Sgarbi;
  • Italiani – Selezione d’arte contemporanea, curaté da Vittorio Sgarbi,
  • Pittori e scultori italiani del Novecento – Il Quadrato, 2005
  • Pittori e scultori italiani di importanza europea  – Il Quadrato, 1992;
  • Bolaffi –Catalogo della scultura italiana, Nr.5, 1981;
  • LXXII Mostra annuale d’arte della regione lombarda (1972);
  • Itinera –percorsi dell’arte locale in Alto Adige, 1995
  • Percorso ricognitivo nella scultura altoatesina, 1990-1993
  • Artisć Val Badia, EPL, 1996

OPERES PUBLICHES:

Via Crucis -danter les plü importantes chëra tla dlijia de S.Maria Goretti a Milan y tla dlijia de Barbisano (TV), sciöche ince deplü monumënc d’ert sacrala.

Dl 2007 ál ziplé na cripl por le Papa Benedët XVI.

Rott á ilustré deplü operes leterares y d’atri tesć a livel internazional –ciara ala seziun dedicada.

Al á fat pert dl comitat artistich pro la mostra panorama & Panorama organisada dala Provinzia Autonoma de Balsan dl 1987 y é sté sides mëmber co presidënt de iuria pro deplü concursc artistics.

Tl cheder dl proiet Rott – ert y musiga en colaboraziun cun süa möta, la musizista Susy Rottonara, él sté consulënt artistich pro le film Le Rëgn de Fanes, che á davagné deplü pesć a livel internazional a London y ti U.S.A. Dl 2011 ál depënt i chedri scenics por l’opera sperimentala Fanes Poem Musical. Dl 2013 ái realisé l’istalaziun multimediala Dolasila, che á albü süa premiere tl MART de Rorëi y é spo gnüda presentada tl Museum-Fondaziun L.Matalon a Milan y dl 2014 tl Istitut de Cultura Taliana a La Valletta a Malta. Dl 2016 ál depënt i chedri scenics por le conzert multimedial Le some de Dolasila. Dl 2017 na videoistalaziun de ert y musiga da Le some de Dolasila á tut pert ala mostra intenrazionala Energia creativa – tra astrazione e figurazione tl contest dla 57. Bienala d’ert a Aunejia tl Palazzo Albrizzi, sënta dl pavillon dl Guatemala.